Estes factores desencadenaron unha forte demanda de servizos urbanos e o desenvolvemento dunha certa actividade empresarial e comercial. Aínda que a infraestrutura hoteleira é a máis completa da comarca, é o comercio o que dá ocupación á maior parte da poboación activa.

O sector secundario fundaméntase nunha variada industria composta fundamentalmente por empresas madereiras, textís, conserveiras e toda a derivada das actividades pesqueiras, pois a pesca é un dos piares fundamentais da economía do concello, en detrimento da agricultura, que foi perdendo importancia pouco a pouco.

Na actualidade, atendendo á importante demanda de solo industrial existente, está a construírse o polígono de Fraga Moreira en San Xoán de Poio, que ocupará unha extensión de case 440.000 metros cadrados. Ademais de incidir de forma moi positiva na creación de emprego da bisbarra, este polígono aspira a fortalecer a estrutura industrial de Poio, facilitando o asentamento de novas empresas e a implantación de novos servizos.