Á súa vez, cómpre nomear a Casa da Torre, antiga casa rectoral hoxe tansformada en granxa. No portón da entrada hai un escudo coas armas de Castro, Caamaño, Mosquera, Xil e brasóns alusivos ao pontificado e á Inquisición.

En Perdecanai atópase o Pazo de Santo Antoniño, tamén coñecido como o Pazo da Crega. Esta construción destaca sobre todo pola súa chimenea almenada e polo hórreo e o pombal que abeira a súa herdade.

Non podemos rematar sen mencionar a casa natal de Ángel María José Amor Ruibal, unha das figuras universais do pensamento galego. Esta edificación foi recentemente restaurada.